女歐國：出線生死戰開火搶芬 撐瑞士第一隊入球_東方日報

女子歐國盃A組尾輪生死戰，瑞士女足硬撼芬蘭女足。依家雙方同分，想出線兩隊只能活一隊，有地利嘅瑞士女足零舍搶韁經常先入波，遇上防守不穩嘅「芬女」，有力先拔頭籌，捧瑞士女足「第一隊入球」。

（HOY TV 76台周五凌晨3時直播）文:法達斯維

先講A組形勢，挪威女足累積6分提早出線，冰島女足0分肯定出局，因此同得3分嘅瑞士女足及芬蘭女足，會爭逐餘下1個出線席位。由於同分係先計對賽，若果今場打和，意味住對賽各項都相同，之後就再計較佳總得失球差、較多總入球，依家瑞士女足總得失球差係+1、總入球係3球，比總得失球差係0、總入球係2球嘅「芬女」稍勝一籌，意味住瑞士女足今場打和就可以晉級，但主場出擊肯定唔會龜縮。

芬蘭女足防線欠穩
瑞士女足今屆演出幾Sharp醒，首輪對挪威女足反勝為敗堅唔抵，次輪則輕取冰島女足兩粒，取得爭出線主動權，而且喺主場球迷吶喊助威下，瑞士女足特別搶韁，連同早前熱身賽在內，佢哋連續3場先開紀錄，其中兩次喺上半場已打破僵局兼取得半場領先，假如今仗又早早入波，唔單止猶如派粒定心丸畀粉絲，亦狠狠打擊芬蘭女足士氣。「芬女」 近4場僅1捷，當中只有1場冇失波，防守唔多穩健，加上佢哋總得失球差唔及對手，今場一定要贏波先可出線，焗攻之下隨時暴露更多空位，令瑞士女足有機可乘，今場先失波一啲都唔奇。