東亞錦：最後一輪唔輸就掂 日本穩陣波強細鬥南韓_東方日報

東亞錦最後一輪賽事，東道主南韓迎戰勁敵日本，兩隊目前同得6分，今場勝負會決定冠軍誰屬。日本依家較佳得失球排榜首，今場只要唔輸即可宣告衞冕，預料會重點加強防守。日、韓兩隊今屆都冇召入喺歐洲效力嘅球星，鋒力明顯下降，決定性一戰會踢得特別謹慎，2.5球入球細值博。（周二晚6時24分開賽）文:工廠仔

日本近年都係亞洲足球「1哥」，今屆賽事明顯志在試陣，上場對中國就換晒全部11名正選，領隊森保一希望「人人有得踢」。喺大批外流歐洲球星缺陣下，日本嘅進攻並唔流暢，把握力亦嫌不足，反而防守上仍然貫徹穩陣作風，長友佑都及植田直通等老將領導嘅防線有一定保證，今仗以不敗為前提，可以放慢節奏。

太極虎遇強防守行先
南韓近年都被日本壓制，雖然今屆有主場之利，但表現穩陣有餘、霸氣欠奉，孫興民、李康仁等星級前鋒未有入選，令「太極虎」入球能力大受削弱，今屆5個入波來自5個唔同球員，陣中冇一個重點嘅入球高手，對住整體戰強大嘅日本難佔甜頭，今場絕對唔敢輕率搶攻。

南韓喺名將洪明甫領軍下，面對強敵多數都係以防守為先，近4場比賽都錄得「零」失球，近7場賽事有5次總入球開2球或以下，今場決賽要抗衡日本，只能夠靠防守支撐，今仗推介2.5球入球細。