南球盃：晉級無望華斯高洩氣獻細_東方日報

聽朝南球盃附加賽次回合，華斯高返主場再鬥迪華利獨立隊。首回合迪華利獨立隊大勝4粒，華斯高失球太多唔慌有戰意，而且主場例少交收，寧捧2.5球入球細。■（周三早上8時30分開賽）文:法達斯維

迪華利獨立隊首回合憑住早早打多1人嘅優勢，最終大勝4比0，如果唔係臨尾有球12碼宴客，隨時贏夠5粒。由於迪華利獨立隊出線機會高唱入雲，今場只要穩打穩紮就可過關，唔排除會收起部分主力，畢竟球季流流長，既然依家遙遙領先，輪換吓無謂搏殘佢哋都好合理。

另邊廂，華斯高輸緊4粒，想博反勝晉級，只係剩番渺茫同冇機會，難免洩晒氣，仲有首回合領紅嘅盧卡斯比頓要坐波監，士氣、實力均受削。睇番呢支巴甲老牌球隊，各項賽事近9次主場出擊，入得8球咁大把，其中7次開2球或以下，攻力咁弱，就算想反cup亦有心冇力，揀細盤好過。

阿美利加巴希亞追和波
同時間開波另一場南球盃賽事，阿美利加主場迎戰巴希亞。首回合互交白卷，大家都想贏怕輸，踢得分外保守，既然兩軍都未佔到甜頭，預計今場都係膠着狀態，睇番阿美利加近6場南球盃全部打和，不妨追多鋪。