澳足盃：易主頭炮點可以失威 西部聯半大打悉_東方日報

今日下午上演澳足盃32強賽事，其中一場「全澳職對決」值得研究，就係西部聯硬撼FC悉尼。西部聯近日獲美國富商入主，今場係換班主後首度出擊，梗係唔想失威，佢哋本身實力唔曳，戰意鮮明下甚有睇頭；FC悉尼屬澳職傳統勁旅，同樣希望染指盃賽，預計一嚟就駁火，雙方近年交手上半場例多波入，首選1.5球半場大。（周二下午5時30分開賽）文:邪神

西部聯上季成績尚算理想，常規賽以前3衝線，到季後賽亦打入4強，上季聯賽兩循環更「雙殺」今場對手FC悉尼。西部聯今季最大轉變，就係球會獲美國房地產大亨Maciek及Mikhail Kaminski父子收購，據報佢哋資產超過10億美元（約78億港元），今次球會易手被視為係「澳洲體育史上最富有交易」，聞說新班主滿腹大計，今場係球隊易手後第一擊，自然多人關注，加上球員為咗前途着想自然更搏命，預計一開波就搶。

FC悉尼決心捲土重來
FC悉尼係前屆澳足盃冠軍，不過上季聯賽成績有所下滑，搞到無緣季後賽，不過佢哋底蘊深厚，今季積極增兵試圖捲土重來，近日力斟剛同拜仁慕尼黑約滿嘅德國名將湯馬士梅拿，可見會方決心重振球隊。今場遇上來勢洶洶嘅西部聯，球員更加唔會退縮，隨時甫交手就開火，睇番雙方近6次交手，5次半場開2球或以上，半場大好快到數。