歐霸盃：維拉超班下盤有信森_東方日報

歐霸盃4強首回合上演「英超內訌」，諾定咸森林主場迎戰阿士東維拉，由「歐霸之神」艾美利執教嘅維拉，今屆表現神勇，近9場歐霸盃全勝，展現冠軍相。反觀森林仍然未擺脫聯賽降班危機，難以全力雙線搏殺，隨時顧此失彼，維拉仲有得受讓平半，下盤抵玩。

（Now 643周五凌晨3時直播）文:Mic少

單睇兩隊英超排名，已經反映雙方實力有一大段距離，第16位諾定咸森林僅領先尾三熱刺5分，球隊最大目標係餘下4場聯賽搶夠分護級，至於爭奪歐霸盃錦標，實屬奢望。

森林兼顧護級讓唔起
事實上，森林即使打入4強，但整體表現一般，歐霸「聯賽階段」只係以第13位出線，當中附加賽主場對費倫巴治，同埋16強主場對米迪蘭特都輸波，發揮唔出地利優勢。至於8強兩回合合計險勝波圖2比1，晉級過程驚濤駭浪，加上仍未擺脫聯賽降班危機，雙線作戰難兼顧，實在信唔過。

相比之下，阿士東維拉排英超第5位，領先第6位白禮頓8分，以前5位參加下屆歐聯機會高唱入雲，現時可以專注歐霸盃爭標，上場聯賽0比1不敵富咸，好大程度上留力踢歐霸盃。維拉最大優勢係領隊艾美利非常擅長對付歐霸賽事，曾經率領西維爾及維拉利爾合共4次捧盃，執教阿仙奴時期亦打入過決賽，維拉今屆歐霸盃戰績彪炳，呢位「歐霸專家」居功厥偉。睇番維拉歐霸「聯賽階段」8戰7勝1負，直入16強，淘汰賽對里爾及博洛尼亞，同樣兩回合都勝出，表現大超班。況且維拉近5次對森林，取得3勝1和1負，明顯食住對手，有力反客為主，坐和望贏。