专家拆局：马模半场斩草除根

马模半场斩草除根

主力复出 杀气腾腾

今晚瑞典超头场赛事之一，榜首马模主场迎战弱旅科根堡。近期气势如虹嘅马模经历联赛8连胜后，上场残阵作客米赞比终于失分，只能打和2比2，今仗回师主场兼有多位主力复出，必搵科根堡做出气袋，可望速战速决，半场主胜值博。

马模上轮失分，好大程度係因为教练汤马臣玩试阵，喺箭头艾锡泰连停赛、老将托禾伦休息之下，马模改用球员唔踢惯嘅「假9」无锋阵，最终喺两度落后下抢番1分，已经有交代。马模今场虽有守将艾密特贺锡停赛，不过今季已有7球进帐嘅艾锡泰连刑满复出，托禾伦亦「叉足电」，加上因伤缺阵多时嘅后防拉斯慕斯宾特臣及拉斯尼路臣，已经全面复操，今场有机会正式复出，马模阵容更加完整。

科根堡后防唔稳阵

作客嘅科根堡实力一般，尤其后防唔多稳阵，今季16场联赛失咗26球之多，佢哋上轮对住态沉嘅AIK苏纳，亦只能踢成1比1，面对锋力强横嘅马模凶多吉少。马模今季主场出击踢法抢缰，近6场主场赛事有4次领先半场。睇埋两军对赛往绩，马模近5次联赛对科根堡，全部都能够半场赢波，今仗可放心直取半场主胜。