专家拆局：利物浦寓赛于操搵萨尔斯堡磨刀

利物浦寓赛于操搵萨尔斯堡磨刀

衞冕英超嘅利物浦，现时正喺奥地利作季前集训，佢哋即将出战喺当地嘅最后一场热身赛，对手係奥甲强队萨尔斯堡。新一季英超将于9月12日开锣，红军首战面对重返英超嘅列斯联，联赛开波前会先喺8月29日社区盾迎接阿仙奴嘅挑战，连场大战杀埋身，相信阵中球员都希望尽快进入作战状态。

早前热身赛面对德甲新升班球队史特加，红军上半场精锐尽出，其中主力前锋罗拔图法明奴喺半场哨声吹响前，已经交出1入球1助攻，状态弗爆。下半场领队高普换入一众后备同年轻球员，包括希腊新兵迪斯米卡斯都获得「地标战」机会，整体表现依然冇跌Watt，再靠20岁小将利安比维斯达锦上添花，最终以3比0轻取对手，班波似乎未受早前有集训营成员确诊新冠肺炎嘅消息影响。

文尼拿比基达斗旧会

今场对手萨尔斯堡同利物浦唔少球员都颇有渊源，沙迪奥文尼、上仗有份入波嘅拿比基达，同埋上季季中加盟嘅日本国脚南野拓实，都曾经效力过呢支奥地利强队。

拿比基达喺两军今届欧联分组赛交手期间，已经入过波，帮利物浦以2比0作客击败萨尔斯堡，呢位畿内亚中场受伤病困扰，过去一季落场时间唔多，来季肯定希望畀多两钱肉紧，争取更多上阵机会。至于上阵时间更少嘅南野拓实，为讨领队高普欢心，呢场对住旧东家都必定搏尽。