专家拆局：墨城上盘咪走宝

墨城上盘咪走宝

西部联老将未回气

澳职季后赛另一场4强，2哥墨尔本城早场斗西部联。常规赛排第5嘅西部联，要多踢一场淘汰圈赛事影响体力，最大问题係西部联「老人锋线」贝利沙同迪亚文迪，年龄相加超过70岁，墨尔本城尽收以逸待劳优势，可望轻鬆赢波，小让平半要上盘。

占美麦卡伦「首入」要吼实

西部联喺淘汰圈赛事，凭意大利老将迪亚文迪一箭定江山，以1比0小胜布里斯班狮吼，取得晋级资格。今场对墨尔本城嘅4强战，已经係西部联8日内第3场波，虽然35岁嘅贝利沙同37岁嘅迪亚文迪前仗先任后备，但上场差唔多踢到足，需时回气。

如无意外，西部联4强战仍然要靠呢两名沙场老将孭飞，体力肯定有所不及；反观墨尔本城上周三踢最后1轮常规赛就抖足1个星期，对手正正就係西部联，当日墨尔本城以3比1轻取呢支今季联赛新军，连同该仗在内，墨城今季常规赛3次斗西部联全部赢晒，摆明格食格。

墨尔本城前锋占美麦卡伦更係西部联剋星，呢3次对赛佢每场梅开二度，合共射入6球，西部联似乎未有方法成功守住占美麦卡伦。呢名澳职常规赛神射手今季射入22球，今场遇着私房菜又可以大开杀戒，墨尔本城上盘要捧。锺意玩首名入球同特别项目嘅朋友，可以留意占美麦卡伦首球，玩埋佢先发事件「入球」，博吓一炮三响。