专家拆局：英格兰丹麦半和有着落

英格兰丹麦半和有着落

球星锡身唔乱搏

欧国联A2组赛事，榜首嘅英格兰主场斗丹麦。丹麦一向係难缠嘅对手，擅踢整体战，赢佢哋要花唔少力气，而且两军有大量效力5大联赛嘅球员在阵，过多几日又要搵食，踢太公波都係就住就住算，双方近5次交手全开半场和，不妨追多一次。

英国人经常都话，国家队领队係全英国第二重要而且难打嘅工，仅次于英国首相。「三狮兵团」领队备受多方面压力，国家队战绩要同球迷交代，但用人又要同各英超球队周旋，如果用残球员又惹来球会抨击，好似今场对丹麦赛前，热刺就想哈利卡尼退队，但英格兰主帅修夫基坚持唔畀，预计今场「哈神」会正选上阵。

近5次交手开晒半和

其实修夫基已经畀足面热刺，英军今轮踢3场波，首战斗威尔斯用尽新人，哈利卡尼只係喺观众席睇波，上场斗比利时亦只係66分钟先派佢上阵，不过热刺主力孙兴民同卢施素都有啲伤，球会今周仲要靠哈利卡尼食胡，相信「哈神」今场自己都会就住踢，同其馀21人情况一样，都唔想因为踢国际赛「为国捐躯」。

论整体实力，英格兰稍为秤高少少，不过丹麦擅长打整体战，而且对英军往绩不落下风，近5次交手获2胜1和2负，当中全开半场和，门将卡斯柏舒米高、贺积查治同基斯甸艾历臣都有丰富英超经验，对英军球员习性瞭如指掌，相信双方半场难分胜负，捧半场和啱数。