专家拆局：热刺明恰韦斯咸

热刺明恰韦斯咸

巴利回巢第1击

「大圣爷」回归第一击！今晚英超爆发伦敦打吡，热刺喺主场迎战「锤仔帮」韦斯咸，而以借将身份回巢嘅「大圣爷」加里夫巴利，今仗好大机会係佢回归英超首度登场，拍住王牌哈利卡尼同孙兴民，三叉戟杀声震天，何况近年碰头食住「锤仔帮」，主胜有买趁早。

热刺喺国际赛前作客大胜曼联6比1，孙兴民与哈利卡尼各入2球，有指「老孙」受伤未必上阵，但其实上仗对曼联前，摩连奴亦表示呢位南韩国脚有伤，结果佢出得兼表现光芒四射，今次赛前声称缺阵随时又係放烟幕。更重要係，今季以借将身份从皇马回巢嘅加里夫巴利，经过短暂养伤后，近排已经复操，仲不断用左脚重炮轰入靓波，连摩帅都大讚佢斗志高昂，有「大圣爷」拍住哈利卡尼同「老孙」，呢支三叉戟唔讲得笑。

同卡尼老孙组三叉戟

除此之外，因应疫情而特别开设嘅「英国转会窗」关闭，热刺又有收穫，成功签入英冠球队史云斯中坚祖朗顿，据悉呢位22岁威尔斯国脚转会费为1,100万镑，再加400万镑浮动转会费。祖朗顿喺上年8月首次为威尔斯国家队上阵，同加里夫巴利份属国家队队友，两人依家仲可以喺热刺拍住上添。

上季热刺与韦斯咸喺伦敦打吡嘅战绩，差天共地，热刺联赛10战获4胜4和2负，韦斯咸只得4胜6负，未试过和波，6场败仗包括作客吞热刺2蛋，主场对热刺亦输2比3，累积近5次联赛交手输咗4次，摆明被热刺食住，尤其係哈利卡尼近2次对碰都有士哥，就算「锤仔帮」近2仗联赛赢晒，亦未必顶得热刺强劲三叉戟，主胜值得捧场。