倫敦打吡激戰捧熱刺客Ｗ|東方日報

英超「倫敦打吡」一樣精彩，「錘仔幫」韋斯咸主場硬撼熱刺。韋斯咸雖然上仗開齋，但佢哋近況麻麻，而且聯賽主場戰績欠佳，相信熱刺可望趁機反客為主，客勝有計。（Now623周四凌晨2時45分直播）

韋斯咸鋒力疲弱
近年喺英超站穩中上游嘅韋斯咸，估唔到開季表現奇差，頭3輪聯賽輸晒兼一球不入，直到上仗對阿士東維拉先至小勝1比0、成功開齋，但鋒力仍極為不足。主帥莫耶斯早前只簽入後衞泰路基拿及艾馬臣柏美尼，未有對症下藥，上季士哥不斷嘅查洛保雲，今季似乎忘帶射門鞋，啱啱以破球會轉會費紀錄5,100萬鎊加盟嘅盧卡斯柏基達，亦未必可以即刻融入，加上「錘仔幫」主場表現失色，連同上季在內，近4仗聯賽主場僅得1和3負，不宜高估。

相反，熱刺開季演出穩定，頭4輪聯賽取得3勝1和，其中造訪勁旅車路士，兩度落後之下仍能逼和2比2，可見喺鐵帥干地領導下韌力十足。雖然前鋒孫興民今季未開齋，但咁樣更加激起佢嘅鬥心，何況前鋒拍檔哈利卡尼每逢出戰打吡戰特別醒神，佢依家喺「倫敦打吡」已經累積攻入42粒，僅落後阿仙奴名宿亨利1球，若果今仗有波入，就可以榮登「倫敦打吡士哥王」，加上近兩次碰頭熱刺贏晒，今仗客勝咪錯過。