噴射機防線連場甩轆 水手回勇大報復|東方日報

今日下晝澳職上演F3公路打吡，中岸水手主場火併紐卡素噴射機。水手上仗回勇贏波，新星加蘭古奧表現搶鏡，噴射機防守曳爆，不過打吡戰冇得縮，寧捧2.5球嘅入球大。（無綫myTVSUPER周三下午4時直播）

查實兩軍喺前仗聯賽先交過手，「5哥」水手同樣喺主場卻以1比2輸畀噴射機；事隔11日再度碰頭，水手梗係想報番一箭之仇。水手上仗對住FC悉尼，早段落後之下反勝2比1，終止聯賽兩連敗，之前為澳洲出戰世盃嘅新星加蘭古奧啱啱歸隊，即製造扳平一球，非常Sharp醒。水手今季入得又失得，7輪聯賽入15球但失12球，全開3球或以上，戰術上明顯係以攻代守。

打吡戰一定鬥攻

另一邊廂，噴射機雖然喺前仗打吡擊敗水手，但佢哋近5仗聯賽輸咗4場，包括上仗末段失守，主場以0比1不敵布里斯班獅吼，今季7輪聯賽場場都有失波，防守不穩，難怪依家排緊尾3，今仗好難保住清白之身，但打吡戰唔會做縮頭烏龜，勢必搶攻。翻查紀錄，雙方近4次正面交鋒，亦有3次開3球或以上，證明打吡戰無分排名高低，戰意行先，大家都一定打甩髀，預計今仗會再演入球騷，大盤有計。