智利大學打雷冇手軟|東方日報

聽朝智甲有場前列大戰，智利大學火併卡拉雷聯。兩軍開咧後表現都叫唔錯，但要留意番卡拉雷聯離開主場未贏過，加上近年碰頭畀智利大學食住，今仗主勝手到拿來。（周五早上7時27分開賽）

卡拉雷聯近況回落
雖然智甲只係啱啱開咧，但智利大學同卡拉雷聯都位居前列，智利大學排緊第3位，而卡拉雷聯暫時落後智大3分。不過卡拉雷聯和波偏多，近4仗聯賽有3仗打和，其中近兩仗同樣人多蝦人少下，仍被柏利斯天奴同紐柏萊斯守和，狀態似乎有所下滑，而且佢哋開咧後3仗作客，只得2和1負未贏過，明顯離開自己地頭立即腳軟。

相反智利大學近期愈戰愈勇，經過首輪輸波後，近5仗聯賽取得4勝1負，其中近3仗更加贏晒，前鋒李安度費南迪斯連續兩仗有士哥之餘，上仗贏古里高聯3比1之役亦交出助攻，表現搶鏡，另一前鋒基斯甸柏拉斯奧斯已有3球進帳，威力驚人。翻查紀錄，雙方近4次正面交鋒，智大全部贏晒，擺明格食格，挾近期連捷氣勢，今仗有力再下一城，主勝屬好路之選。