颶風隊主場出擊贏畀里睇|東方日報

國際賽前夕，可供選擇聯賽並唔多，今次推介阿甲颶風隊主場迎戰羅沙里奧中央。颶風隊主場表現出色，跨季近11場聯賽主場取得9勝2和，經過連續3場聯賽失分之後，今仗勢必把握地利優勢，全力爭勝搶分，建議捧主勝。（周二早上8時開賽）

雖然颶風隊名氣比唔上兩支阿根廷傳統勁旅小保加及河床，但其實已經有114年歷史，近年成績唔錯，上季聯賽獲得第4位，皆因主場出擊搶分力強，相信今仗又係佢哋表演時間。加上颶風隊兩位前鋒尼高拉斯哥迪路同古甸奴腳風非常順，開季7輪聯賽已經各有3球進帳，勢必對羅沙里奧中央防線構成重大威脅。

羅沙里奧作客兩連敗
至於羅沙里奧中央就聯賽作客兩連敗，合共失咗7球，可見後防非常不穩，面對來勢洶洶嘅颶風隊，恐怕難以招架。加上雙方近3次對賽，颶風隊獲得全勝，合共攻入對手8球，明顯屬於格食格，預料颶風隊有力再下一城。