迎丙組仔勢出副選 勝利船細盤最穩陣_東方日報

今晚日本天皇盃第2圈，日職「3哥」神戶勝利船主場迎戰日丙嘅長野帕塞羅。雖然牌面睇落強弱懸殊，不過勝利船近況麻麻，加上對弱隊唔排除會輪換，遇上擺鐵桶陣嘅長野帕塞羅，隨時老鼠拉龜冇碇埋手，2.5球入球細值得捧場。（周三晚6時開賽）

由於勝利船上周中同巴塞隆拿踢熱身賽，因此延至今周先打日皇盃，呢支開季順風順水嘅日職勁旅，近況有回落迹象，唔計對巴塞，近4仗正式賽事只得2勝1和1負，除咗上月中聯賽畀柏雷素爾逼和1比1外，日前聯賽造訪大阪櫻花，更因門將前川黛也完場前犯低級錯誤，出迎解圍畀人截到個波送入空門，搞到輸1比2兼讓出榜首位置，都幾打擊士氣。同時，勝利船今仗只係對弱旅，或會收起部分主力，點都有影響。

長野帕塞羅擺鐵桶死頂
另一邊廂，長野帕塞羅喺日丙只排第6位，近3仗聯賽仲輸晒添，狀態差強人意。但長野帕塞羅都好有自知之明，每逢出戰日皇盃踢得分外保守，尤其係對住勁旅更加小心，佢哋之前4次於日皇盃硬撼日職球隊，全開2球或以下，包括2021年法定時間末段畀川崎前鋒逼和1比1，互射12碼飲恨，相信今仗都會照辦煮碗，做縮頭烏龜死守不出，勝利船想攻陷佢哋唔易，寧捧細盤。