女世盃：澳洲疲兵頂唔住英格蘭_東方日報

今晚女世盃4強對決，東道主澳洲女足迎戰英格蘭女足。澳洲女足上仗互射12碼驚險晉級，搏得咁盡未回氣，英格蘭女足今屆5戰4勝1和未輸過，表現平穩，撞正疲態畢露嘅澳洲女足，有力反客為主，讓平半可捧上盤。（ViuTV96及Now630周三晚6時直播）

袋鼠兵上仗搏足120分鐘
澳洲女足藉着主場之利，表現令人驚喜，喺今屆5仗女世盃，法定時間取得3勝1和1負，其中4仗保持清白之身。不過澳洲女足上仗8強戰面對勁旅法國女足，連加時搏足120分鐘打和0比0，互射12碼癲到要射足10輪，澳洲女足有3人宴客，只係法國女足仲衰有4人唔入，最終險勝7比6，無論係心理負荷，抑或體能消耗都好大，匆匆再戰未必回得切氣。

另一邊廂，英格蘭女足今屆女世盃演出平穩，5仗法定時間取得4勝1和不敗佳績，其中上仗8強戰面對哥倫比亞女足，係佢哋今屆首次先落後情況下，仍然沉着應戰，憑蘿倫漢普及阿歷西亞蘿素各建一功反勝2比1，盡顯韌力。雖然英軍仍有前鋒蘿倫占士繼續坐波監，但從上仗所見影響唔大，經驗豐富嘅佢哋懂得留放，而上年能勇奪女子歐國盃，與佢哋踏入淘汰賽轉用保守踢法有關，今鬥疲兵澳洲女足睇定嚟食，相信可在法定時間贏波殺入決賽，上盤有計。