英超：新兵對辦打吡戰攞威 惡客車路士夠贏韋斯咸_東方日報

英超上演倫敦打吡，韋斯咸主場迎戰車路士。兩隊上場都和波，不過論表現車路士對辦得多，今場仲有新兵摩西斯卡些度登場，值得睇好，加上近6次交手車路士4勝1和1負，明顯佔優，客勝看高一線。（Now621及611周日晚11時30分直播）

韋斯咸喺英超首戰作客末段畀般尼茅夫逼和1比1，對方追和之前仲有一次勁射中楣，反映球隊後防並唔穩陣，就算前邊入到波，後防都頂唔住，至於新加盟嘅禾特普斯同艾臣奧馬艾華利斯都會上陣，兩人首次合作，幫唔幫到手屬未知之數。

兵源充足個個搶韁

車路士首輪同利物浦踢成1比1，佢哋全場演出更勝紅軍，前場逼搶製造唔少攻勢，雖然列斯占士養傷，但勝在兵源充足，新加盟嘅門將羅拔山齊士同右閘文路古士圖獲重用，破紀錄1.16億鎊加盟嘅摩西斯卡些度又會亮相，仲有羅美奧拉維亞喺賽前官宣轉會，陣容鼎盛，落場球員個個搶韁，加上往績佔優，車仔客勝值捧。