巴甲：紅牛甘美奧細均力敵_東方日報

聽朝巴甲快車尾場上演前列搶分對決，巴拉干天奴紅牛主場硬撼甘美奧。紅牛力爭參加下屆自由盃，主場出擊或會穩中求勝；甘美奧作客表現麻麻，相信亦唔敢輕舉妄動，中位數2.5球入球細屬不二之選。
（周五早上8時30分開賽）

巴拉干天奴紅牛早前喺南球盃16強，兩回合同阿美利加明尼路踢成4比4，最終互射12碼飲恨出局，惟有專心番聯賽。佢哋目前只係落後第4位嘅法林明高3分，絕對有機殺入前4，直接獲下屆自由盃分組賽席位。查實紅牛主場表現極為硬淨，近9仗聯賽主場不敗，雖然和波偏多，但勝在防守穩健，單計近5仗聯賽主場只失1粒，全開2球或以下，防守可投下信心一票。

關鍵大戰唔會亂攻
另邊廂，賽前排第3嘅甘美奧近4仗聯賽錄3勝，但全部都係嚟自主場，佢哋作客戰績差天共地，單計近5仗聯賽作客，只得1勝1和3負，包括上次造訪下游分子山度士，竟然反輸1比2，證明球隊作客唔多夠信心。雖然甘美奧排名較高，不過只係領先紅牛3分，呢場關鍵「6分波」為免畀對方過頭，定必小心為上，唔慌多波入，一於捧入球細。