歐冠：留力打吡戰見好就收 阿仙奴細盤有得芬_東方日報

歐聯B組焦點戰，阿仙奴主場硬撼燕豪芬。阿仙奴事隔6屆重返歐聯舞台，第一擊梗係唔想失威，但嚟緊有北倫敦打吡，今仗隨時見好即收，近年出戰歐洲賽堅保守，加上對親燕豪芬例少交收，3.5球嘅入球細更可取。（Now644周四凌晨3時直播）

自從2016至17年度球季後，阿仙奴連「搶4狂魔」之名都保唔住，連續6屆未能參加歐聯，近年只能淪為歐霸常客，雖然上季爭英超冠軍失敗屈居亞軍，但亦攞到今屆歐聯入場券呢份「安慰獎」，今仗當然相當重視。不過要留意，阿仙奴近5仗4勝1和睇落唔錯，但其中3仗僅勝1粒，上仗有翼鋒加比爾馬天尼利傷出，箭頭加比爾捷西斯傷愈冇耐未弗，尼基迪亞勤力有餘把握力一般，呢5仗只入9球，進攻火力麻麻。

燕豪芬附加賽未受考驗
另邊廂，燕豪芬於國內聯賽頻演入球騷，之前喺歐聯附加賽淘汰格拉斯哥流浪，兩回合入咗7粒，但與對手偏弱有關，嚟到分組賽先係考驗，首輪仲要造訪呢組實力最強嘅阿仙奴，唔敢輕舉妄動。翻查紀錄，阿仙奴近6仗歐洲賽有5次開3球或以下，包括上屆歐霸分組賽兩鬥今仗對手燕豪芬，非常保守，加上嚟緊周日聯賽要火併北倫敦死敵熱刺，今仗都係點到即止，唔慌多波入。