英聯盃：賓福特求穩細盤秤仙啲_東方日報

今晚英聯盃第3圈有場「倫敦打吡」，由賓福特主場迎戰阿仙奴。論牌面「兵工廠」梗係高一截，不過佢哋今季要4線作戰，點都要作出取捨，加上球隊近排傷兵滿營，預計大量副選可獲落場機會，進攻流暢度必打折扣，2.5球入球細值得捧場。（周四凌晨2時45分開賽）

阿仙奴或遣副選應戰
阿仙奴上場「北倫敦打吡」被同市死敵熱刺逼和2比2，耗力甚多，中場迪格蘭賴斯勇戰受傷離場，加入加比爾馬天尼利、李安度杜沙特同湯馬士柏迪等傷兵行列，嚟緊唔夠48小時後又要喺聯賽作客般尼茅夫，下周中再出戰歐聯分組賽，賽程異常頻密。相比下英聯盃肯定係重視程度較低，主帥阿迪達隨時派出大量副選同新人，進攻能力未必同平時一樣。

賓福特近況麻麻，近5場賽事不勝，不過佢哋向來踢法硬淨，體力化打法可以克制阿仙奴嘅技術流。王牌前鋒艾雲東尼仍然停賽當中，令球隊反擊能力削弱唔少，喺淘汰賽以穩陣為先下，相信今場會演變成拉鋸戰。賓福特近4仗英聯盃，總入球全開2球或以下，證明佢哋踢盃賽穩陣行先，2.5球細盤值得再追。