英錦賽：諾士郡盡地一煲做大騷_東方日報

今晚英錦標北部G組賽事，英乙球會諾士郡越級挑戰英甲嘅打比郡。諾士郡小組首仗輸波，要爭出線不容再失，主場出擊必盡地一煲搶攻，呢支英乙1哥踢法進取，面對強陣出擊嘅打比郡預計大手交易，捧2.5球入球大穩陣。（周三凌晨2時開賽）

諾士郡自從去年請到主帥路克威廉斯上任，成績突飛猛進，上季成功由地區聯賽升上英乙，估唔到升班後繼續神勇，目前喺英乙排榜首，有機會「坐火箭」連續兩年升班。曾經喺白禮頓青年軍任教嘅路克威廉斯，引入進取踢法係球隊爆發主因，尤其主場出擊相當勇猛，近6仗主場賽事狂轟16粒，全開3球或以上。由於英錦標分組賽只踢3場，首仗輸波嘅諾士郡冇得保留，相信會選擇狂攻。

打比郡作客同樣進取

打比郡今季目標都係爭升班，上場逼和車頓咸後，近6仗保持不敗，陣中有華漢同文迪斯蘭治等前英超兵，論實力肯定高於主隊，而且佢哋小組首仗全取3分，今仗贏埋就好大機會出線，加上佢哋對上6場作客賽事都有入波，一於博2.5球入球大。