澳職：墨爾本勝利發威派Ｗ_東方日報

今午澳職大戰，墨爾本勝利主場迎戰威靈頓鳳凰。兩隊開季表現出色，3戰同樣取得2勝1和，得失球差相同，墨爾本勝利以較多得球排聯賽第2，威靈頓鳳凰排第3，表現不相伯仲，不過近3次交手墨爾本勝利全勝，似乎墨爾本勝利贏面較高，熱捧主勝。

（無綫myTVSuper周五下午4時45分直播）
墨爾本勝利近況對辦，特別係射手科拿路利頭3輪合共攻入6球，包括前仗主場對紐卡素噴射機半場食出「大四喜」，現時暫居射手榜首位，腳風奇順，今場定必繼續數胡。新簽法國中場麥赫治極速融入球隊，佢曾效力法甲馬賽及意甲拿玻里等歐洲勁旅，嚟到澳職屬大超班，為科拿路利提供強力支援，加上今季回巢嘅翼衞阿達馬查奧爾交出兩個助攻，攻力強勁，喺中堅洛迪歷米蘭達停賽之下，今場實行以攻代守。

威靈頓鳳凰作客走樣
威靈頓鳳凰近況唔差，前鋒奧斯卡沙華達上仗主場對布里斯班獅吼連中三元，3輪攻入4球，依家排射手榜第2，不過佢哋今季兩場勝仗都係主場，作客表現稍差，聯賽首仗作客西悉尼流浪者只能守和0比0，之前澳足盃作客墨爾本城更淨吞3蛋，今場作客墨爾本勝利，實在唔睇好。