加利李爾：惡意競爭沒有好下場_星島日報

每支球隊組軍時最少有三位守門員可以候命上陣，不過正選只得一個，以前細個會忽發奇想，三位門將訓練時究竟乜嘢心態？萬一開賽前一日，後備門將喺正選門將啲飯餸落瀉藥，瀉到佢聽日腳軟，不就有機會出場？

大個之後知道了甚麼是良性競爭，3位門將在團隊內都有不同角色，通常有一位當打，另一位裝備自己隨時頂上，第三位一般年紀較大，知道自己出場機會最少，大多在訓練場和更衣室用經驗指導後輩。但三人同時都是以球隊為中心，球隊有成績的話三位門將同樣開心。至於想要成為唯一的正選，就要在訓練場上下苦功令自己進步，適當的時候機會就會來臨。以曼聯為例，即使正選門將奧拿拿上半季表現不穩，但你不會聽到後備的巴耶迪亞抱怨「自己訓練比奧拿拿更落力」。到有一天他自覺當打仍等不到機會的話，自然會要求轉會尋找機會，如甸恩軒達臣一樣，所以你從來不會聽過一位球迷說「不用巴耶迪亞就不再支持曼聯」這類低能說話。

職場上有人很天真，在團隊內總愛自找惡性競爭對手，以為他們折墮了便到自己上位，於是對卸膊賴皮搞關係等小動作樂此不疲。當你跟他說有甚麼問題時，這類人的思維仍然停在「我自己已經好畀心機做咗乜乜乜」，卻永不知道自己問題在於他們眼中沒有團隊意識。點解領隊要揀最好嘅門將上陣？因為要有成績，成績係同客戶交代，觀眾係客戶，老闆係客戶，贊助商亦係客戶。你瀉到我個正選門將肚屙出唔到場，就算你有能力頂上我亦唔會派你上陣，反而係即刻將你貶落預備組，因為你分分鐘連第三門將都瀉埋。加利李爾