美聯：揭幕戰鬥鹽湖城 國際邁亞密群星造細_東方日報

新一季美職開鑼，揭幕戰國際邁亞密主場硬撼皇家鹽湖城。上季未能殺入季後賽嘅國際邁亞密，雖然坐擁美斯為首嘅「巴塞4子」，但佢哋有「季初病」，近4季聯賽首仗只曾1勝，其中3場開2球或以下；皇家鹽湖城陣容大變，面對主隊嘅星級陣容亦唔會亂攻，吼實3.5球入球細。（周四早上9時開賽）

碧咸做班主嘅國際邁亞密擁有美斯、布斯基斯、佐迪艾巴，同埋新加盟嘅蘇亞雷斯，實力大增，但畢竟幾位球星年紀偏大，再難長期保持巔峰狀態，近期熱身賽輸多贏少，僅曾在香港站贏波，而且當時因為美斯同蘇亞雷斯受傷缺陣引起軒然大波。香港站之後兩場熱身賽，該阿根廷球王都未有踢足全場，明顯未上力，新季第一場贏波有難度。

人腳大執位穩陣為先
皇家鹽湖城絕非弱旅，佢哋上季聯賽位居西岸第5位，不過今季人腳大執位，主力射手達美亞基拿治同沙華連奴分別轉投溫哥華白帽同保地花高，翼鋒穆素夫斯基加盟西雅圖海灣者。雖然從米杜士堡簽入馬特曲斯，以及上季美職最佳新人巴拉克斯來投，但新陣容需要時間適應，以佢哋上季17輪作客只失23球嘅穩健防線，今場實行守住先，預計入波唔會多。