意甲：國米藉地利穩勝阿特蘭大_東方日報

意甲周中賽事，國際米蘭主場迎戰阿特蘭大，「藍黑兵團」現時高踞榜首，而且近況極佳，近5場主場全勝，包括歐聯16強首回合1比0擊敗馬德里體育會，聖西路主場出擊屬贏波保證，加上國米近4次對阿特蘭大全勝，主勝最可取。（Now638周四凌晨3時45分直播）

近４次交手贏晒
國米踏入2024年錄得10連勝，先捧走意超盃，歐聯16強重開即贏馬體會，聯賽7連勝後目前少踢1場領先次席祖雲達斯9分，形勢一片大好，而且前鋒線火力全開，近兩場聯賽均大炒沙蘭力坦拿及萊切4蛋，拿達路馬天尼斯兩場入3粒，就連阿歷斯山齊士上場都交出助攻，成隊波順風順水，今晚主場出擊贏波非常正路。

阿特蘭大正爭取前4位置，近期頻頻搶分，表現唔差，不過佢哋呢段時間將要經歷「地獄賽程」，包括上場對ＡＣ米蘭打成1比1，6連勝走勢斷纜，今場火併國米之後將要硬撼博洛尼亞，跟住就係歐霸盃16強對士砵亭，兩回合中間仲有場對祖雲達斯，賽程頻密硬仗連場，今場惡鬥實力最強且近年對賽全敗嘅國米，預料難以匹敵。