专家拆局：比利时破冰赢到尽

比利时破冰赢到尽

迪布尼弄瓦醒神

今晚欧国联A2次轮赛事，比利时主场硬撼冰岛。「欧洲红魔」实力超晒班，箭头卢卡古及梅顿斯又脚风坚顺，中场奇云迪布尼睇完BB出世后火速归队，所谓人逢喜事精神爽，撞正当黑嘅冰岛，直取让球主胜。

原本奇云迪布尼踢完上轮就因「家有喜事」告假，飞返英国陪老婆待产，喺前日奇云迪布尼嘅「三小姐」终于出世，而迪布尼见完囡囡Suri后随即归队，估计今仗可以上阵。

其实即使冇咗迪布尼，比利时依家嘅阵容都劲到冇朋友，其中箭头卢卡古弗到漏油，唔单只喺国际米兰大翻身，近12次为「欧洲红魔」披甲，一共轰入12粒，信心爆晒棚，上场欧国联轻取丹麦2比0，佢拍档梅顿斯又入波兼助攻，队长夏萨特终于摆脱伤患困扰，上场刻意避战，唔排除今仗复出领军，配合主帅马天尼斯崇尚进攻嘅战术，势必火力全开。值得留意嘅，係马天尼斯今次弃用巴舒亚伊、奥历治及宾迪基等常规后备，反而召入安德列治新人谢利美杜古、迪马达及禾沙治亚伦，增强新鲜感之馀，预计佢哋就算后备上阵，都会抢缰过巴舒亚伊之流。

冰岛中坚恩加臣坐波监

另边厢，冰岛接连杀入2016年欧国盃及2018年世盃决赛周后，开始走下坡，而且喺英超搵食嘅基菲尔施古臣、贝治古蒙臣，以及防中艾朗根拿臣悉数落选，上场欧国联唔单止畀英格兰绝杀，临尾仲有比卡比查拿臣操刀12码宴客，黑仔到晕，主力中坚恩加臣更被逐要坐波监，实力进一步受削。何况比利时状态大勇，近9场赢晒之馀，有7次赢3球或以上，加上近年交手食住冰岛，今仗大炒冇难度，让球主胜值得捧场。