地頭出擊勝率偏低 修咸頓讓唔起韋斯咸|東方日報

英足盃16強另一場英超內訌，「聖人」修咸頓主場火併「錘仔幫」韋斯咸。修咸頓雖然硬淨唔易輸，但主場出擊和波偏多，讓波擇使，加上近年碰頭「錘仔幫」略佔上風，讓球客勝值得捧場。
（無綫myTVSUPER周四凌晨3時30分直播）

修咸頓近年經常季初甩轆，去到季中先發力，最終亦護級成功，今季情況相若，各項賽事近12仗，只係輸過1場咁大把，主帥夏辛侯迪嘅高強度逼搶打法，連曼市雙雄同熱刺，對住佢哋都要失分收場。「聖人」的確硬淨到暈，不過唔代表一定贏到，尤其係主場，佢哋近8仗喺自己地頭出擊，錄得3勝5和，包括上圈英足盃法定時間打和英冠球隊高雲地利1比1，要鬥到加時先晉級，今仗要讓波確係揀唔落手。

「錘仔幫」踢法趨向保守
韋斯咸狀態亦一般，各項賽事近5仗只得2勝3和，包括上圈英足盃對住弱旅京達米士特，法定時間去到末段先靠迪格蘭賴斯扳平，加時亦要到完場前藉查洛保雲建功奠勝，驚險晉級。由於射手米查利安東尼奧腳風欠順，韋斯咸近期都踢得比較保守，翻查紀錄，雙方近8次交手，「錘仔幫」獲得5勝2和僅1敗，受讓必捧讓球客勝。