國米搶分明恰費倫天拿|東方日報

今晚意甲焦點戰，國際米蘭主場迎戰「紫百合」費倫天拿。國米近期頻頻失分，為爭冠不容再失，遇上「私房菜」費倫天拿，絕對係反彈良機，主勝最穩陣。（Now638周日凌晨1時直播）
馬天尼斯重拾射門鞋

原本位居榜首嘅國米，經歷近6仗聯賽僅得1勝，包括上仗靠阿歷斯山齊士補時入波逼和拖連奴1比1，勉強搶番1分，依家已跌落第3位，打少1場下落後「1哥」ＡＣ米蘭4分。隨住歐聯16強出局，意盃4強次回合要4月中先上演，國米現時可專心於聯賽發力，早前陷入球荒嘅拿達路馬天尼斯，近3仗入4粒，箭頭迪斯高亦回勇，火力有保證。

費倫天拿自從喺冬窗高價賣走射手杜辛華荷域後，近6仗聯賽只得3勝入6球，包括上仗打多1人下贏博洛尼亞1比0，攻力大減。除此之外，「紫百合」今季14仗聯賽作客，只係得5勝2和7負，明顯作客腳仔軟。翻查紀錄，雙方近3次聯賽碰頭，國米全部贏晒，佢哋今季聯賽共轟61球，單計主場就入35粒，咁強大嘅火力，要摧毀「紫百合」冇難度，為爭取衞冕聯賽冠軍冇得保留，一於捧主勝。