重拾火力喪炸丹麥 荷蘭無帥照捧主W|東方日報

荷蘭周日凌晨主場同丹麥拍跳，雖有老帥尹戈爾確診未能領軍，但「方丈」已為球隊打下基礎撥亂反正，丹麥有基斯甸艾歷臣回歸亦難擋荷蘭強攻，捧主勝。（有線661及601台周日凌晨3時45分直播）

尹戈爾確診未能督師
荷蘭向來崇尚進攻，不過前主帥法蘭迪保亞反其道而行，佢偏重反擊打法唔work，令「橙軍」表現跌Watt，搞到上年歐國盃16強出局，佢亦黯然下台。幸好尹戈爾出山第3度執教，憑佢擇善固執堅持打進攻足球，適逢鐵衞華基爾雲迪積克傷愈，球隊攻守回復平衡，單計近6仗獲5勝，不但已取得世盃入場券，這6仗更轟入21球，可見尹戈爾嘅進攻風格已植根球隊，就算今仗未能督師亦影響不大。

丹麥上年歐國盃首仗就有中場指揮官基斯甸艾歷臣因心臟病發倒下，全隊反而被激發爆冷闖入歐國盃4強，之後強勢持續取得世盃入場券。不過呢種「士氣波」總有冷卻一日，畢竟丹麥整體質素並非歐洲頂尖，而且隊長卡積亞及箭頭巴夫韋迪受傷，植入心臟起搏器嘅艾歷臣病愈後在賓福特上陣僅3仗，狀態難復舊觀，近日更曾確診，今次獲重召象徵性多於實際作用，造訪荷蘭惡唔出樣。