鋒力跌Watt咬唔入麥克阿瑟 FC悉尼啞火獻細|東方日報

澳職季後賽爭逐白熱化，FC悉尼今日喺主場迎戰FC麥克阿瑟，誰勝誰負相當關鍵；兩隊目前分別排喺季後賽邊緣嘅第6同第5位，同第10位球隊亦只有4、5分差距。雖然搶分戰意鮮明，不過FC悉尼近期鋒力令人失望，加上進攻發電機連高域受傷，就算主場出擊都未必咬得入FC麥克阿瑟，博2.5球入球細最穩陣。

（myTVSUPER周三下午4時05分直播）
暫時以24分排聯賽第6嘅FC悉尼，今季一直表現不穩，早前曾錄得3連勝似有起色，但上仗面對超殘陣嘅紐卡素噴射機，FC悉尼竟然慘吞兩蛋，一眾前線球員不斷錯失入球機會；英格蘭前鋒方祖已超過3個月未喺聯賽入過波，狀態低迷，新加盟嘅荷蘭前鋒盧斯安奴拿辛格亦未融入，最慘係中場發電機連高域上仗拉傷大腿，今場大有可能缺陣，進一步削弱球隊鋒力。FC悉尼近4場聯賽，有3場總入球為2球或以下，今場好大機會再開細盤。

麥軍變陣踢守勢波
FC麥克阿瑟依家以25分位列聯賽第5，但近況比悉尼更差，佢哋近6場聯賽僅得1勝，今仗作客首要目標以「止血」為先，佢哋上仗對墨爾本城明顯一改有前冇後作風，雖然最終都以0比1輸波，但防守確實比之前穩陣唔小，有力頂得住鋒力不足嘅FC悉尼，加上雙方聯賽及盃賽近4次對賽，有3次總入球都開2球或以下，今場不妨追入球細。