搵獅吼報仇鳳凰大反擊|東方日報

今日下午另一場澳職搶分激戰，布里斯班獅吼主場迎戰威靈頓鳳凰，雙方剛於3月中交鋒，當時獅吼主場贏2比1，今仗再次對壘，心理上有優勢。不過，鳳凰為爭入前6位踢季後賽亦急需要搶分，作客都唔會退縮。考慮到獅吼近5場聯賽總入球全部達3球或以上，一於再追2.5球入球大。

（myTVSUPER周三下午4時05分直播）
布里斯班獅吼已落後第6位嘅FC悉尼7分，爭入季後賽機會唔大，但唔代表會採取放棄態度。佢哋上仗對聯賽2哥西部聯，即使處於劣勢，但仍然奮力一戰，最終僅以2比3落敗，可算雖敗猶榮。事實上，獅吼踢法主攻悅目，近7場聯賽主場出擊都有波入，合共轟入13球，今仗好大機會延續走勢，攻破鳳凰大門。但獅吼防線始終較弱，近兩場合共失5球，恐怕難保清白之身。

搏盡搶分爭入前6
至於威靈頓鳳凰排第7位，同FC悉尼同分，兼踢少對方3場，打入前6名機會樂觀，但前提必須盡力贏波。鳳凰上仗擊敗珀斯光輝，總算結束兩連敗，有助重振士氣，加上今場再鬥獅吼，必然想報番一敗之仇，相信會更落力搶攻，有利製造更多入球，大盤好路。