皇馬食住個勢再發維|東方日報

前線撻着副偈
西甲焦點大戰，西維爾主場硬撼「一哥」皇家馬德里，第3位嘅西維爾已經落後對手12分，爭標機會渺茫，球員戰意成疑。反觀皇馬全力衝冠，近7場聯賽贏6場，上周中歐聯8強淘汰車路士，打入4強，士氣大振，必然想食住個勢，力爭盡快將聯賽冠軍寶座據為己有，可直取客勝。（Now632及611周一凌晨3時直播）

西維爾近5場聯賽僅1勝，加上上月歐霸盃被韋斯咸淘汰，對呢支「歐霸之王」造成沉重打擊。同埋西維爾喺早前西甲前列大戰，0比1不敵巴塞隆拿後，更加難以威脅皇馬榜首位置，最令人失望係，上仗對護級分子CF格蘭納達，西維爾要踢到補時先至連入2球，驚險贏4比2，可見球員缺乏鬥志，遇上勁旅皇馬，形勢更加危。

對賽恰慣西維爾
皇馬對於聯賽冠軍志在必得，近7場聯賽6勝1負，該場敗仗係因陣容嚴重不整，導致不敵巴塞隆拿，其後已經迅速反彈。射手賓施馬近況大勇頻頻入波，今季西甲已入24球，喺射手榜遙遙領先，雲尼斯奧斯祖利亞貢獻14球同12次助攻。呢對進攻組合非常合拍，上周中歐聯8強次回合加時，再次合作創造入波，由「小雲」傳畀賓施馬頂入關鍵1球，以兩人嘅出色狀態，足以撕開西維爾防線。雙方近6次對賽，皇馬獲得5勝1和，相信今仗可全取3分而回。