馬賽撼飛燕諾等睇入球騷|東方日報

歐協聯4強次回合對決，周五凌晨法甲代表馬賽主場再鬥荷甲球隊飛燕諾。落後嘅馬賽呢次返到地頭，肯定主動出擊，面對踢法進取嘅飛燕諾，兩隊隨時繼首回合之後，再演對攻大戰，中位數2.5球入球大係不二之選。（Now646周五凌晨3時直播）

兩軍同樣有前冇後
首回合飛燕諾靠迪沙斯梅開二度，以及史尼斯泰拉建功，以3比2擊敗馬賽。呢支荷甲勁旅踢法進取，攻擊點多，除咗暫時以10球高踞歐協聯射手榜首位嘅迪沙斯之外，白賴仁連斯臣及古斯迪爾均具數胡能力，攻力甚強，不過與此同時球隊防守並不穩固，今季歐協聯只有首仗作客海法馬卡比踢成0比0保持清白身，近10仗歐協聯全部有失球，10仗全開3球或以上。

今季由歐霸轉戰歐協聯嘅馬賽，同樣係攻強守弱嘅球隊，計埋淘汰圈附加賽，馬賽近3場歐協聯主場全勝，不過場場都有失波，全開3球或以上。今場有皮耶同謝臣山度士等進攻好手壓陣，力爭扭轉敗局嘅馬賽，有本錢再同對手鬥攻，大盤唔好錯過。