備戰唔足！小袋鼠兵捱「細」界|東方日報

Ｕ23亞洲盃B組賽事，上屆季軍澳洲Ｕ23首仗面對科威特Ｕ23，牌面上澳洲Ｕ23明顯較高，不過佢哋嘅備戰受到聯賽影響，唔及已集訓多時嘅科威特Ｕ23，而且雙方都屬守優於攻嘅球隊，大賽首戰必定格外謹慎，博中位數2.5球嘅入球細。（周三晚上9時開賽）

科威特Ｕ23守得吓
呢支澳洲Ｕ23以2024年巴黎奧運為目標，陣中唔少球員都已經喺澳職累積咗唔少經驗，好似中岸水手中場祖殊尼斯畢、阿德萊德聯前鋒古辛尼恩基等等，不過部分球員喺上個星期先踢完季後賽同明星隊賽事，之後就匆匆歸隊，備戰時間不足，或會影響賽事初段表現。

澳洲Ｕ23球員防守效率可靠，但進攻能力不足，對上3屆9場分組賽當中，有6場總入球開2球或以下，踢法明顯重守輕攻。科威特Ｕ23喺外圍賽兩戰全勝只失1球，防守力同樣值得信賴，今仗有力抵擋未上力嘅澳洲Ｕ23進襲，宜先向2.5球入球細埋手。