「勝利」對決易分高低 神戶超班速破丙組仔|東方日報

今午日皇盃第2圈賽事上演「勝利對決」，神戶勝利船主場迎戰富山勝利。勝利船漸有起色，落選「藍武士」嘅兩大前鋒武藤嘉紀同大迫勇也要踢爭氣波，今仗誓搵丙組仔祭旗，加上近年於日皇盃例打閃擊戰，半場主勝值得捧場。（周三下午5時開賽）

坐擁「小白」恩尼斯達等球星嘅勝利船，今季出閘脫腳，頭11仗聯賽竟然未贏過，一度淪為包尾。好彩之後換帥，搵咗西班牙老帥洛迪拿接手，總算止跌回升，先喺亞冠盃分組賽出線，返到聯賽近5仗取得2勝1和2負，包括日前大炒北海道札幌岡薩多4比1，信心漸復。

大迫勇也踢爭氣波
值得一提嘅，係日本今輪國際賽期，並冇召入任何勝利船球員，除咗武藤嘉紀冇份外，被視為主帥森保一「契仔」嘅大迫勇也亦名落孫山，令人意外。雖然日本有試陣味道，不過今次入選嘅外流前鋒前田大然、古橋亨梧、淺野拓磨都有明顯進步，而大迫勇也今季各項賽事入得4粒咁大把，再唔加把勁，其「藍武士」首席中鋒地位隨時不保。

富山勝利儘管近期連場報捷，但畢竟佢哋只係日丙球隊，實力同勝利船仍爭幾條街，何況佢哋近年於日皇盃遇上日職球隊，例如浦和紅鑽、鹿島鹿角、大阪櫻花同今仗對手勝利船，全部都輸波收場，遇強即屈。睇番勝利船近5仗日皇盃有4次半場領先，況且今季聯賽表現仍屬差強人意，必定博喺盃賽發圍，遇弱定必一開波即搶攻，半場主勝有計。