37歲基亞連尼告別戰 意國阿根廷最強對決|東方日報

無緣卡塔爾世盃決賽周嘅意大利，周四凌晨會喺倫敦溫布萊球場大戰阿根廷，呢場「歐美冠軍戰」係非一般熱身賽，賽事由歐洲足協同南美足協合辦，由歐國盃冠軍鬥美洲國家盃冠軍，分量十足。今仗仲係意大利中堅基亞連尼嘅國家隊告別戰，令呢場大戰更添意義。（周四凌晨2時45分開賽）

近3對賽阿根廷全勝
37歲嘅基亞連尼早前宣布今場係佢嘅告別戰，呢位中堅15歲就加入意大利青年軍，2004年首度進身大國腳，為「藍衣軍團」各梯隊征戰22年，去年帶領球隊勇奪歐國盃冠軍，基亞連尼喺告別戰前表示：「我好平靜，我為自己足球生涯所得到嘅成就感到光榮。」今場比賽場地溫布萊，正正就係佢上年捧起歐國盃冠軍嘅地方；基亞連尼早前已落實離開祖雲達斯，據報將會加盟美職洛杉磯銀河。

意大利今場以試陣為主，18歲新人前鋒基諾圖有望處子上陣，相反阿根廷會強陣出擊，美斯、拿達路馬天尼斯等主力可以候命。意大利同阿根廷近年甚少喺國際賽交鋒，最近3次熱身賽交手都係由阿根廷贏出，今仗呢支南美球隊勝算較高，捧客勝。