聖保羅睇定食主勝冇甩拖|東方日報

聽朝南球盃16強次回合，巴甲聖保羅主場出擊，再鬥智甲球隊天主教大學。首回合聖保羅作客贏4比2，天主教大學為晉級非勝不可，可惜佢哋防守曳爆，焗攻隨時中門大開，聖保羅挾今屆南球盃7仗6勝之勢，主勝手到拿來。（周五早上8時30分開賽）

首回合戰況其實都好激烈，入波你來我往，最終聖保羅作客贏4比2，不過就付出沉重代價，伊戈雲尼斯奧斯、洛迪高尼斯托及射手卡里利做「紅牌阿姑」，今仗齊齊坐波監，點都有啲影響。

天主教大學焗攻仲大鑊
首回合失利嘅天主教大學，今仗贏到兩粒就可重頭嚟過，背水一戰下必定要搶攻，但要留意佢哋於自由盃分組賽出局降格而臨，連同南球盃首回合在內，近5仗南美賽僅得1和4負未贏過，兼且場場有失波，防守曳到爆，焗攻只會自暴其短。

聖保羅狀態不俗，各項賽事近4仗取得3勝1和，而且佢哋今屆南球盃特別醒神。連同16強首回合在內，7仗南球盃豪取6勝1和未輸過，狂轟16粒，單計3次主場出擊更加贏晒，全部冇失波，做到攻守兼備。雖然今仗有3大主力停賽，但佢哋手握兩球優勢，大可趁天主教大學急需扳平而搶攻，後防空虛下，疊埋心水打反擊更為煞食，再贏多次唔奇。