不來梅藉地利執到堡|東方日報

瘋狂進攻好睇又好使
今晚德甲獨腳戲，雲達不來梅主場迎戰奧格斯堡。雙方今季入波數字係「天與地」，不來梅5戰入12球，奧格斯堡只入3球，加上不來梅最近7次鬥「奧堡」獲5勝，不來梅可憑主場之利搶3分，主勝不容錯過。

（周六凌晨2時30分開賽）
以德乙亞軍身份升班嘅雲達不來梅，重返德甲表現絕不失禮，5戰2勝2和1負排第8，少帥奧利雲拿嘅瘋狂進攻戰術，好睇又好用，頭4場聯賽戰果分別係2比2、2比2、3比2同3比4，到上仗作客波琴更進一步，以零失球嘅2比0比數贏波，每場最少入2粒，5場合共入咗12球，入球數字同柏林聯一樣，僅次於拜仁慕尼黑嘅17球。

奧格斯堡火力疲弱
相對於不來梅嘅侵略性，奧格斯堡嘅攻力就令人擰晒頭，「奧堡」5仗僅射入3球，前線遇上嚴重入球能力不足問題，佢哋雖然有貝列沙加盟，但佢上季喺費倫巴治入球能力亦只一般，幫唔到幾多。「奧堡」聯賽只得1勝4負，表現慘不忍睹，加上過去對不來梅往績不濟，今場作客更難爆冷，主勝乃不二之選。