普馬斯防守差追大盤|東方日報

今日同大家研究一場墨超，祖亞雷斯主場迎戰普馬斯。兩隊都排下游位置，爭入首階段季後賽機會不大，但都會盡力爭取較高名次，普馬斯簽入丹尼爾後成績並無改善，特別係防線失球數字高企，佢哋近4仗全開3球或以上，揀中位數2.5球入球大好路。

（周六早上10時開賽）
因為前巴塞球星丹尼爾加盟，令普馬斯成為大眾焦點之一，查實佢哋近年成績唔錯，前季首階段排第2，並殺入季後賽決賽得亞軍，上季亦喺首階段季後賽打入4強，不過今季成績下滑，僅得2勝8和6負排下游，16仗失28球，成績差相信同失球太多有關。

丹尼爾加盟後表現一般
39歲嘅丹尼爾今夏加盟普馬斯絕非養老，而係爭取上陣，為入選巴西世盃大軍盡最後努力，佢喺巴塞同巴西踢右閘，但佢級數高，喺普馬斯就變成踢中場中，不過佢加盟12場都冇波入，球隊亦輸多贏少，僅得1勝。

祖亞雷斯近年徘徊聯賽下游，上季次階段更淪為榜尾，今季唔使包尾已經有進步，佢哋上次主場2比1贏前列分子帕丘卡，今仗食過翻尋味勢必強攻對手，應該會多波入。