車仔未Run順入球細扑錘|東方日報

今晚英超早場「倫敦打吡」，韋斯咸主場迎戰車路士。韋斯咸近期表現穩定，防守能力好番好多，「黃金戰車」左堆右砌都仲未砌靚部車，攻力欠奉問題仍有待改善，加上球隊近9場聯賽8次開2球或以下，今場向2.5球入球細埋手。

（Now621及611周六晚8時30分直播）
車路士上場主場鬥富咸，兩名新兵安素費南迪斯同梅迪歷都正選上陣，但係火花欠奉。夏維斯喺前面踢落硬係格格不入，今場雖然有祖奧菲歷斯停賽3場後復出，但領隊樸達似乎仍未搵到最佳進攻套路，究竟新陣容點樣擺先係最好，都仲要睇多兩場。

不過可幸嘅係，車路士嘅失球數字已經大大減少，雖然對富咸同利物浦都入唔到波，但連同對上一場聯賽鬥水晶宮，「車仔」保持3場不失，算係攞番少少安慰。事實上，佢哋近9場聯賽8次開2球或以下，預料今場踢法都係穩中求勝。

韋斯咸防守有改善
韋斯咸今季出人意表地大冧檔，現時排17位，不過近期表現好番好多，上場聯賽作客「新土豪」紐卡素，都能夠逼和1比1，近5戰取得3勝1和1負。呢5場「錘仔幫」只失過兩球，更有3場能夠保持不失，防守轉趨穩健，今次主場鬥另一支億萬大軍，相信都係穩守突擊為主，入球細值得跟進。