殘陣迎烏甸羅馬焗獻細|東方日報

意甲羅馬主場迎戰烏甸尼斯，羅馬上仗歐霸盃8強首回合輸波，兼有2位射手保羅戴巴拿、譚美阿巴謙受傷，對球隊造成沉重打擊，加上嚟緊周中要踢次回合生死戰，今場聯賽未必去盡。考慮到羅馬近5場賽事有4場總入球開2球或以下，寧願博中位數2.5球嘅入球細。（Now638周一凌晨2時45分直播）

羅馬雖然要搶分，力保前4位，但球隊喺摩連奴執教下，本身攻力偏弱，今季29場聯賽僅入39球，屬於前7位球隊之中入波最少。屋漏偏逢連夜雨，保羅戴巴拿上仗歐霸盃傷出，呢位阿根廷國腳今季意甲為羅馬創造17個入球，包括射入11球及6次助攻，屬於進攻靈魂，若然佢缺陣，勢必令鋒線雪上加霜，加上有6球進帳嘅譚美阿巴謙亦可能倦勤，羅馬想入波，非常困難。

有歐霸盃後顧要留力
此外，摩連奴亦要考慮歐霸盃8強次回合問題，畢竟首回合作客僅0比1不敵飛燕諾，次回合有地利優勢，仍有相當大機會反勝，今場聯賽或有所留力，爭取歐霸盃晉級。

至於烏甸尼斯喺聯賽中游位置，高不成、低不就，球隊戰意成疑，加上近5場聯賽作客僅入2球，估計難以對羅馬防線構成太大威脅。翻查雙方近10次對賽，有7次總入球開2球或以下，細盤比較值博。