馬天尼斯收咧紅魔大鬧中堅荒|東方日報

今季喺曼聯勁搶鏡嘅利辛度馬天尼斯（圖），上周中喺歐霸盃8強對西維爾受傷退下火線，尋日曼聯正式宣布，呢位阿根廷中堅蹠骨骨折，將會缺陣今季餘下賽事。同時另一位中堅華拉尼喺嗰場歐霸亦「中招」，需要抖數星期，令紅魔突然陷入中堅荒，想爭前4及英足盃冠軍，都恐怕唔樂觀。

隨住利辛度馬天尼斯同華拉尼打柴，曼聯就得番域陀連迪路夫同哈利馬古尼兩名正宗中堅。然而，呢對後防拍檔一向唔多穩陣，更大鑊係馬古尼喺英足盃4強對白禮頓停賽，意味屆時只有連迪路夫一位正宗中堅可用，領隊坦哈格排陣肯定好頭痛。

PlanB用勞基梳爾客串
面對突如其來嘅中堅荒，有英國傳媒指坦哈格有PlanB救亡，就係用勞基梳爾串演。呢位英格蘭後衞今季試過多次改踢中堅，且有不俗表現，不過梳爾早前亦有傷，已經缺陣近兩場比賽，佢能否及時復出鎮守中路，實屬疑問。另外，卡斯米路亦有能力客串中堅，但球隊非常需要呢位巴西國腳喺中場負責掃蕩，甚至組織攻勢，如果佢移後踢中堅，對於曼聯整體而言，未必有利。