開火搶前4紅軍入球騷迎賓|東方日報

今晚英超尾場，利物浦主場鬥賓福特。「紅軍」嚟到季尾重拾信心，聯賽5連勝重燃爭前4希望，主場出擊更會放膽搶攻；賓福特有艾雲東尼壓陣，攻力亦不容忽視，一於捧3.5球大盤。（Now621周日凌晨零時30分直播）

利物浦近期火力全開，穆罕默德沙拿、加普及迪亞高祖達頻有士哥，近5仗聯賽全勝，進攻重拾昔日光采。佢哋不嬲靠主場搵食，近6次聯賽主場獲5勝1和，包括大炒曼聯及逼和阿仙奴，威力堅勁。「紅軍」依家踢多一場下落後「4哥」曼聯4分，爭前4仲有價講，既然個勢咁好，必定先做好自己再望對手失分，睇下有冇奇迹。

賓福特近況唔曳照駁火

賓福特近況都唔曳，近3仗聯賽2勝1和，射手艾雲東尼今季聯賽累積射入20粒，單計近7仗就有4球進帳，不過佢哋近8仗只有一場冇失波，作客面對防守同樣唔算穩陣嘅「紅軍」，鬥攻方為上着。睇番利物浦近5仗主場，有4次開4球或以上，今仗可望合演入球騷，捧大最划算。