曼城勒唔住大舉進攻|東方日報

爭霸入直路啟動無敵Mode

英超爭霸進入最後直路，掌握冠軍主導權嘅曼城，已經進入「遇神殺神」模式，聯賽9連勝兼且連場大炒，「士哥王」艾寧夏蘭特勒都勒唔住；列斯聯為護級想盡辦法，剛剛搵嚟艾拿戴斯救亡，作客亦希望偷雞搶到分，3.5球入球大穩陣兼好分。

（Now621及611周六晚10時直播）
曼城朝住「3冠王」目標進發，一眾球星季尾愈戰愈勇，上輪打破英超史上單季最高入球紀錄嘅夏蘭特，連續6場聯賽入波交出8粒，射到着晒火，其餘一眾攻擊好手如奇雲迪布尼、祖利安艾華利斯及菲爾科頓等位位都有貢獻，「藍月」近8場聯賽主場有7仗至少入3球，火力驚人。

列斯聯為護級冇得死守
列斯聯係英超近況最差球隊，近5場聯賽只有1和4負，為求留級，管理層陣前臨時易帥，搵艾拿戴斯代替查維加西亞領軍。列斯聯降班危機嚴重，如果一心死守相信捱唔到幾耐，倒不如豁出去搏一搏。事實上列斯聯球員嘅DNA就係進攻，只可惜防線漏洞百出，對上5場聯賽狂失18球。翻查兩隊近3次對賽，總入球全開4球或以上，預料今仗會有大量入球出現，3.5球大盤有分頭，值得捧場。