保衞前4！曼聯開攻搶客W|東方日報

今晚英超另一焦點之戰有韋斯咸主場對曼聯，「錘仔幫」韋斯咸近期惡戰連場，球員疲於奔命，結果遭遇3連敗，兩位中場主將迪格蘭賴斯、湯馬士蘇錫克有傷在身，令球隊雪上加霜。曼聯為力保前4位而戰，爭勝決心強，加上雙方近6次對賽，「紅魔鬼」獲得5勝1負，客勝值得追捧。（Now621及611周一凌晨2時直播）
韋斯咸需要搶分護級，但季尾賽程非常難踢，近3仗全敗，當中輸畀利物浦同曼城並唔令人意外，最大打擊係3比4不敵同級對手水晶宮，連番受挫之下，難免削弱士氣。

韋斯咸留力爭歐協聯

屋漏偏逢連夜雨，兩位中場主將迪格蘭賴斯、湯馬士蘇錫克有傷在身，缺陣上陣對曼城，結果慘吞3蛋，若然兩人今場無法復出，勢必難以同「紅魔鬼」抗衡。此外，韋斯咸將於周中歐協聯4強首回合對阿爾克馬爾，緊密賽程壓迫之下，非常考驗領隊莫耶斯調配兵力，稍有不慎，隨時顧此失彼。

另一邊廂，曼聯踢法愈來愈有侵略性，早前作客另一支倫敦球隊熱刺，上半場已經領先兩球，雖然最終被逼和，但並冇影響球員信心，其後擊敗大勇嘅阿士東維拉，拉舒福特、費奴般南迪斯、卡斯米路等中前場球員狀態出色。曼聯上仗創造唔少攻勢，但補時被判罰12碼，遭白禮頓絕殺，實在唔抵，球員谷埋一肚氣，加上曼聯已連續3次擊敗「錘仔幫」，今場一於捧曼聯客勝吐烏氣。