女世盃：上屆亞軍實力經驗勝一籌 荷蘭勢勇速擒葡萄牙_東方日報

女子世盃E組歐陸大戰，荷蘭女足同葡萄牙女足交鋒，兩支歐洲球隊處於唔同水平，上屆亞軍荷蘭女足大部分球員都喺歐洲豪門效力，經驗同實力兼備，相反葡萄牙女足只係萌芽階段，首次出戰決賽周經驗不足，難同「橙衣兵團」匹敵，荷蘭女足踢法進取，半場主勝有力開出。（Now630周日下午3時30分直播）

荷蘭女足上屆決賽輸畀美國女足，今屆同死敵同組志切復仇，呢場「美荷大戰」次輪分組賽就會上演，荷蘭女足今場恃住實力同經驗優勢，會喺早段全力搶攻務求盡早鎖定勝局，留力下場復仇大戰，相信早段搶攻會幾得人驚。

連場大勝狀態極佳
荷蘭女足今屆雖然有效力阿仙奴嘅傳奇前鋒美迪瑪重傷缺陣，不過陣中仲有唔少好波之人，包括祖雲達斯前鋒貝倫絲迪恩等等，而且佢哋近兩場熱身賽分別4比1大炒波蘭女足、5比0大破比利時女足，證明球隊狀態極佳。

葡軍羽翼未豐難匹敵
葡萄牙女足近年先至慢慢冒起，今屆係佢哋第一次出戰決賽周，球員質素頗為參差，而且經驗亦不足。荷蘭女足今屆以冠軍為目標，第一擊會力求贏得漂亮，佢哋近7仗有5次半場領先，今仗會繼續搶攻爭取早開紀錄，半場主勝值得支持。