女世盃：法國半場大擦魚腩_東方日報

女子世盃F組，強弱懸殊之戰，法國女足對牙買加女足，「法女」近兩屆都打入8強，上屆分組賽更加3戰全勝，現時隊內有唔少球員效力勁旅里昂女足，整體實力強橫。牙買加女足屬於「魚腩球隊」，恐怕上半場就會失陷，半場主W冇肉食，不妨博中位數1.5球嘅半場大。（Now630周日晚6時直播）

法國球壇多年來積極發展女子足球，兩支法甲勁旅里昂及巴黎聖日耳門（PSG）嘅女子隊，獲得輝煌成就，其中里昂女足曾經8次奪得女子歐聯冠軍，其中近8屆6次捧盃，至於PSG女足曾經兩次打入決賽。法國女足以呢兩支班霸嘅球員為骨幹，自然成為歐洲一線勁旅，並打入上年女子歐國盃4強，今仗遇上呢隊「魚腩球隊」，相信上半場足以大炒對手。

牙買加上屆分組賽全敗
中北美洲球隊牙買加女足第二次出席女子世盃決賽周，佢哋上屆首次參賽，分組賽3戰全敗，合共失12球，防線弱不禁風，往往比賽早段就失守，近兩仗女子世盃上半場都落後兩球。
牙買加球員主要喺美國搵食，近年並冇明顯進步，今仗面對爭標熱門之一嘅法國女足，實在凶多吉少。