女世盃：瑪達搶胡巴西大盤有揸拿_東方日報

6度征戰女子世界盃嘅巴西女球王瑪達，今日喺Ｆ組領軍撲擊巴拿馬女足。瑪達連續5屆世盃都有士哥，對弱旅可望再下一城；巴拿馬女足賽前熱身賽鬥西班牙同日本，分別慘輸0比7及0比5，點頂得住「森巴女足」狂攻，中位數4.5球入球大放心捧。（Now630周一晚上7時直播）

巴西女足從未缺席過9屆女子世界盃決賽周，可惜仲未贏過冠軍，最接近係2007年決賽以0比2不敵德國，近3屆都未能突破8強。今屆球隊以老帶嫩，首戰鬥巴拿馬正係建立信心好時機。女球王瑪達參與5屆世盃都有入球，同加拿大女足姬絲甸冼佳亞及男足C朗睇齊，如果今屆再有士哥，就會獨佔呢個紀錄，今仗會力爭數胡。

決賽周「新丁」巴拿馬女足平均年齡較低，空具活力但經驗輸蝕，喺外圍賽附加賽雖然保持不失，不過早前熱身賽接連大敗畀西班牙及日本，可見質素一般。佢哋近3場全開5球或以上，難擋「森巴女足」狂攻，4.5球大盤咪錯過。