女世盃：德國女足細盤嗒得洛_東方日報

慣留前鬥後唔慌去盡

今日女子世界盃H組，德國女足對摩洛哥女足。「德女」曾兩次奪冠，屬於今屆爭標熱門之一，實力遠勝「摩女」，不過佢哋同男足一樣，傳統上比較慢熱，未必會大炒對手。摩洛哥女足踢法保守，近7仗總入球全開3球或以下，一於追中位數3.5嘅入球細。（Now630周一下午4時30分直播）

德國女足曾於2003及2007年連續兩屆成為女子世盃冠軍，雖然近3屆成績稍稍滑落，兩屆8強出局及一次4強止步，但球隊根基深厚，上年女子歐國盃就獲得亞軍，可見正重回正軌，要贏摩洛哥女足喺小組打響頭炮，問題不大。不過考慮到賽事剛剛展開，德國女足未必會出全力，以免消耗太多體力，甚至造成傷兵問題，影響後段爭標。事實上「德女」上屆分組賽頭兩場皆小勝1比0，今屆隨時歷史重演，留番啲體力應付往後賽事好過。

摩洛哥女足冇入波本錢

另邊廂，摩洛哥男足上年世盃爆冷打入4強，成為一時佳話，但佢哋嘅女足仍然處於起步階段，今屆首次進身世盃決賽周，無論實力同經驗都唔可以同「德女」相提並論。加上摩洛哥女足狀態欠佳，近5場比賽不勝，只有2和3負未有入波，攻力疲弱難以威脅「德女」大門，相信今仗輸少當贏，細盤博得過。