意甲：搶半程冠軍國米W趁熱食_東方日報

今晚意甲強弱懸殊之戰，熱拿亞主場迎戰國際米蘭，熱拿亞表現持續低迷，近5場聯賽僅1勝；反觀國米狀態大勇，取得聯賽4連勝兼不失球，今仗足以輕取熱拿亞，提前鎖定「半程冠軍」，客勝趁熱食。（Now638周六凌晨3時45分直播）

熱拿亞後防太嫩多甩漏
由前意大利國腳基拿甸奴執教嘅熱拿亞，今季重返意甲後表現反覆，只能喺下游掙扎，球隊進攻點單一，冰島前鋒艾拔古蒙臣包辦球隊大部分入球，亦係12碼劊子手，令對手易於防範，後防迪雲達同達古辛都太年輕，容易有甩漏，近4場都先失波，好難擋住國米進攻。

國米現時領先次席祖雲達斯4分，再贏1場即可提前一輪鎖定「半程冠軍」，佢哋就算作客都保持水準，跨季9場聯賽作客取得8勝1和，包括以3比0大勝上季冠軍拿玻里，雖然首席射手拿達路馬天尼斯受傷缺陣，但馬古斯杜林、查漢奴古等中前場球員腳風非常順，相信可輕鬆贏波。